ياليتني بارض الخلا اليوم سواح
هالبيتين جتني من اخي وصديقي سعد المفرح ( ابو احمد )من الرياض :
في هذه الاجواء الجميلة كأني بحال ابو حاتم يقول :
ياليتني بارض الخلا اليوم سواح
ارعى الغنم واطرد طيور الحباري
ماهمني من قال ذا جا وذا راح
اعيش عمر مايعرف الطواري
وطلب مني اجاريها فكتبت له :
من قال يا ليتي فمكنونه انباح
يبي الطبيعه والقنص والمساري
ومن كان طبعه للوناسه والافراح
يبي ترا يلقى خوي مباري
اليوم يومك اغتنم منه ترتاح
ترى مفاتيح السعادة مواري
ما دام جوك يسمح اكسب هالارباح
ما دمت تقدر قدرتك يا مشاري
حمد بن عبدالله العقيل
مجمع الضيافة بالعارضة
١٤٤٦/٨/٤هـ
واضفت له ان بيتينه ذكرتني بابيات كتبتها حول المعنى وارسلتها للشاعر الصديق صالح المحمد الكريدا من عنيزه عام ١٤٣٣هـ أرسل لي الاخ الشاعر صالح الكريدا يسال عن الجديد فقلت له اي جديد تبي فكتب هذا البيت
كل الجديد الي على بالك أبغـــــاه
يسعد صباحك يا فتى الجود هاته
فارتجلت هالابيات
ما من جديد اللي على الكيف تبغاه
اشغال دنيا دوختنا سواتــــــــــــــه
إما تروغ بحالها عنك بشغــــــــاه
والا فتقطع كل وصل وحلاتـــــــــه
يا ليتني طفل يغاغي مغاغـــــــــاه
ان صاح يسكت ثم يسلي سلاتــــه
والا مطوع لين شاف الملاغــــــاه
قام وتوضى وانتظم في صلاتــــــه
والا كما طير يجيد المناغـــــــــــاة
لا صار فوق الاثل غنا غناتــــــــه
والا كما حشوالبدو يزعج رغاه
في روضة خضرا يطارد خواته
ما من جديد اللي على الكيف تبغاه
اشغال دنيا دوختنا سواتــــــــــــــه
تفاعل مع الابيات على الفور الشاعر صالح الكريدا (كفيف البصر وقوي العارضة والبصيرة ) وهو ومن شعراء الرد بعنيزه
يا مرحبا باثنين في وقت الاصباح
إعداد ما هبت هبوب الذواري
ودي اجاريكم على كل مصلاح
يا أهل الوفاء والطيب وأهل السواري
