قصيدة تراثية جدران بيت الطين
كتبتها بعد ان شاهدت المقطع المرفق
جدران بيت الطين للطيب عنــوان
ومداهل فيها الشرف والمكانـــــــه
لو في بيوت الطين احساس ولسان
تبي تكلم وش جرى في زمانــــــه
تشهد على الماضي وكل الذي كان
وتشرح لنا كيف الحياة بأمانــــــــه
وتذكر رجال كلهم طيب وايمـــــان
مع قل وجد المال ما قل شانــــــــه
قبل الفجر بالذكر يقرون قـــــــرآن
وبعد الصلاة الناس تترك مكانـــــه
عاشوا على بساط الجماله بالاحسان
كل بذكر الله يتمتم لسانــــــــــــــــه
في ديرة من طين والطين عمــران
حمايل وسطه وكله رزانـــــــــــــه
بين الفلايح والمكاين لها شـــــــــان
من يسمع (الطق طق) تطرَّب أذانه
ومنولن يسنون بجمال قلبــــــــــان
والا بقر والثور يمسك عنانــــــــــه
الى دخلت المزرعه شفت رمــــــان
وترنج مع تفاح والنخل زانـــــــــــه
وتحت النخل خضرة وفيها النما بان
من القرع أو من ثمر بيدجانــــــــــه
كني اراهم بين نخل وعسبــــــــــان
اللي يروس الماء واللي أعانــــــــه
هذي حياة قد مضت بين الأزمــــان
عاشوا أهلها بين خبل وتكانــــــــــه
يارب ترحمهم شباب وشيبــــــــان
وتجمع بفضلك في جنان العدانــــــه
لو في بيوت الطين احساس ولســـان
تبي تكلم وش جرى في زمانــــــــه
قصيدة تراثية جدران بيت الطين
