القيتها بمناسبة خاصة بمزرعة الكوثر في المزاحمية ١٤٣٩/٤/٢٥هـ
بسم الله الرحمن الرحيم
قصيدة اجتماعية فكاهية
(قصيدة الحبحر )
هذه القصيدة بنيتها على مراحل
من خلال الاحتكاك ببعض الإخوان الشعراء ، ومنهم الأخ الشاعر مقروش والأخ الشاعر فهد بن زيد من موقع قصيمي ، ثم الأخ الشاعر الحساس والشاعر علي الخراشي والشاعر محمد القرزعي رحمه الله
ومشاركاتهم نتجت عن موضوع لي بعنوان ( الله يا ذيك الحكايا والصور )
وظهرت بهذا الشكل الذي سترونه
أرجو أن تعجب القراء
وهذا جهد بشري قابل اللصواب والخطأ
المطلع
- دربيت برميلي الين آخر الحـــــوش
- أبيه يترس بالمياه النظيفــه
- هذا هو المطلع مع الحب وبهــــوش
- وابدا بيوتي بمزحتي هالظريفـه
- تراث
- يام الاول بيتنا الطين مرشــــــوش
- من الغرينة عن مطر منه خيفه
- والبيت به شمسه وسيعه به فــروش
- من الحصى كنه بلاط رهيـفه
- والقربة اللي معلقه مويته خـــــوش
- نقوطها بارد وهالحبل ليفه
- وبالسطح تلقا طاية اسمنت مفـروش
- ومنفوح نحفظ فرشنا به صفيفه
- وعمد الخرز والجص أبيض ومنقوش
- وهاك الغما بالخام ما هي شفيفــــه
- والقبة اللي ببيتنا عرش معـــــروش
- هواه بارد والرواشن مريفـه
- ذكريات قديمة
- مقروش ليتك تشرب الببس بالحـوش
- وعند الدبش تحشي بدينك غريفــه
- وليتك تشوف الحال والشعر منفوش
- لحدى بنات السوق والوجه شيفــــه
- أو تلعب المصقال في مسكته خــوش
- أو بالكعابه طزقها له وحيفــــــــــه
- يا ليت يحصل لو ربع قولنا نحـــوش
- من حالة كنا نعيشه ظريفـــــــــــه
- ذاك الزمن أحلا به نهاش ونهــوش
- والناس في أبسط حياته أليفــــــــه
- عدت علينا مثل الاحلام ورهـــوش
- يا ليت ترجع والهقاوي ضعيفــــــــه
- فكاهة في الطعام
- ذكرت اني ذابحن جوع مخــــــروش
- الله ييسر لي مضيِّف لضيفـــــــــه
- يذبح لي من الحيل وانشها نـــــوش
- آكل لما أشبع ولا هي نحيفـــــــــــــه
- وأحط فوقه ما يشهي يا علــــــوش
- فوق الطعام اللي يقدم غريفـــــــــــه
- حبحر يلولش يدعي الحلق به لــوش
- مسحون (حق الرس) بعلبه ظريفـــــه
- إلى ذريته فوق صحني غدا خـــــوش
- يبي زبادي من حراره عنيفـــــــــه
- آكل ولا ادعي بالعصاعيص عرموش
- والحس مصابيعي وتبقى نظيفــــــــه
- ومن الدجن القى من البر مجـــروش
- والا مراصيع وبصلها نضيفــــــــــه
- والا مطازيز رهيفات وكـــــــروش
- مع بيدجانه والقرع خوش ضيفــــه
- ومن أكل جيزان زومه ومحشــــوش
- والا مغش وهالعصايد طريفــــــــه
- والا مفالت ومكشن الحوت مرشوش
- مع البرام الصاخنة لي صفيفــــــــــه
- ومكه بها منتو وكبيبه ويغمــــــوش
- مع البليلا بللوها خفيفـــــــــــــــه
- والا سمك هامور مالون وقــــروش
- صياد صاده بالشباك الخفيفـــــــــــــه
- وان ما حصل لو معكرونه وفتـــوش
- وحمص مع متبل مع اللي يضيفــــــه
- خل البطن يشبع وما حاشه يحـــوش
- ولا أتعنى في حياة كليفـــــــــــــــــه
- مدخل لموضوع القصيدة
- يا راعي القهوة ترى البن مجــــروش
- زهب معاميلك ونجرك وليفـــــــــــه
- وهات الدلال الصفر في لمعته خوش
- وبهر لنا من زاهي البن كيفــــــــــــه
- نصائح اجتماعية
- أكتب لكم حكي طرزته و منقــوش
- هذي أمور قد تعدت مخيفـــــــــه
- خوذوا حذركم من خدَّاع مربـــوش
- واوحوا نصايح قلت منها واضيفـــــــــه
- باسم التقدم طالنا لبس طربـــــوش
- من عولمه تبدي أمور مخيفـــــــه
- قالوا عن( الإيمو )به الشر منفـــوش
- ياللي بالاسود في شتاها وصيفــــــه
- ترا الأمر مكرٍ لشيطان مخشــــــوش
- يبي يكفرهم بشركه صريفـــــــــــــــه
- لا شفت (طيحني) ولا شفت (كدوش)
- ثم شفت سكسوكه بسحبه صخيفـــــه
- تغدي حياتي عومسه دايره بـــــوش
- ثم انقهر واون ونة خفيفـــــــــــــه
- اياك والغشاش وملصق رمـــــــوش
- وعيونه اللي رمشها به نتيفـــــه
- حتى الذهب لا ما سلم منه كل غوش
- زادوا فصوصه ثقلوا هالخفيفــــــــــه
- بنوا لهم من كذبهم قصر وعـــروش
- وساعة كرمهم يطعمون الدويفـــــــه
- هذي نصايح انثره قافهـــــــــا أوش
- خوذوا محاسنها وعدوا سفيفـــــــــه
- وصلوا على سيد البشر قايد جيــــوش
- كثر المطر ورياح نوحي وحيفــــــــــــه
